!!!!!!! ( बिमल मनका भावहरु ) !!!!!!

         नजिक बसि तिमी सँगै कुरा गर्ने चाहना        

         खै कसरी पुरा गर्ने के बनाउने वाहना?

         बुझ्न खोजेत बुझ्थ्यै होली किन बुझ पचाएकी?

         मलाई हेर्ने तिम्रा नजर किन अन्तै नचाएकी?

         होहल्लामा डर लाग्योकी? एकान्तमा बसौंन

         माया पिरतीको डोरी अझ बेसरी कसौंन

         डर छोड भर पर घर बनाऊ मायाको

         नछुट्टिने वाचा गरौं जस्तै घाम र छाँयाको ।

          सौन्दर्यकी खानी तिमी रुपै तिम्रो गहना

          टाढा बाट धित मरेन अली नजिक सरन

          जून जस्तै धप्धप् बल्दै मुहार किन सजाएकी?

          हेर्न खोज्दा निहुरिदिन्छ्यौ किन त्यसै लजाएकी?

          उज्यालोमा लाज लाग्योकी अँध्यारोमा हेर्छुनी

          मन भरीको माया बोकी अँगालोमा बेर्छुनी

          पर हैन वर सर मन सजाउ मायाले

        नछुट्टिने बाचा गरौं जस्तै घाम र छाँयाले ।।

तिम्रो आगमनले मेरो एक्लै बस्ने बानी हराएछ

सपनीमा तिमीलाई अँगाल्दा मेरो सिरानी हराएछ ।

 हँसाई मिठो गुलाबी अधर मिलेका ती दन्त लहर

तिम्रै मुस्कान हेर्दाहेर्दै मेरो रुने बानी हराएछ

सपनीमा तिमीलाई अँगाल्दा मेरो सिरानी हराएछ ।

सधैँ भरि तिम्रै कुरा गरिरहुँ भन्छन् ओठहरु

तिम्रै बयान गर्दा गर्दै मेरो आफ्नै कहानी हराएछ

सपनीमा तिमीलाई अँगाल्दा मेरो सिरानी हराएछ ।

दुईचुल्ठी कपालभरि फुलले सजाईदिन्छु भनी

रङ्गीन फुल टिप्न जाँदा मेरो फुलदानी हराएछ

सपनीमा तिमीलाई अँगाल्दा मेरो सिरानी हराएछ ।

सुन्दर संसार झिलिमिलि तिम्रै आँखाले हेर्छु भनी

चार आँखा दुई पार्दा मेरो आँखाको नानी हराएछ

सपनीमा तिमीलाई अँगाल्दा मेरो सिरानी हराएछ ।

हिजो,

मैले तिम्रो यादमा एउटा चुरोट सल्काएँ
चुरोट सँगै तिम्रो सम्झना बिस्तारै बिस्तारै जलाएँ
तिमी याद आइरहनु, म जलाउँदै जानेछु
आफु पनि चुरोटको धुँवामा उड्दै उड्दै जानेछु
अनि त,
एकदिन कसो नभइएला ?
यहि रफ्तारमा,
     चुरोटको ठुटो र मेरो जीवन उस्तै उस्तै
दुरुस्तै, तिमीले मलाई बनाउन खोजे जस्तै ।

आज,

फेरी तिम्रो यादमा एउटा सिसी रित्याएँ
सिसी सँगै तिम्रो माया बस्ने मुटु कलेजो सिद्धयाएँ
तिमी मलाई झस्काइरहनु ,म पिउँदै जानेछु
आफु पनि नशाको भेलमा बग्दै बग्दै जानेछु
अनि त,
एकदिन कसो नभइएला ?
यहि रफ्तारमा,
     रित्तो सिसी र मेरो जीवन उस्तै उस्तै
दुरुस्तै, तिमीले मलाई बनाउन खोजे जस्तै ।।।